y2h1


فــــــــــــــريــــــــــق الــــــــــــغــــــــــــــــــلابــــــــــــــــــه زائر
 
الرئيسيةبواباتي الخاصهمكتبة الصوراليوميةس .و .جبحـثالتسجيلدخول

شاطر | 
 

 نصائح أم

اذهب الى الأسفل 
كاتب الموضوعرسالة
wafaa



عدد الرسائل : 58
نقاط : 3781
السٌّمعَة : 0
تاريخ التسجيل : 18/05/2008

مُساهمةموضوع: نصائح أم   الإثنين مايو 19, 2008 12:02 pm

انتي النهاردة أم لأول مرة .. اهلا بيكي ف عالم الامومة الواااااااااااسع والمتعب جدا.. كان بودي اضحك عليكي واقولك ان تربية طفل حاجة سهلة خالص وزي شكة الابرة ، بس الحقيقة ضميري مش مطاوعني.. تربية طفل شيء صعب جدا ، دا غير ان العناية بيه مليانة تفاصيل مرهقة بجد.. متقلقيش.. افتكري انك بتدفعي تمن الجنة ، واطمني.. الارهاق هيبقى بالنسبة لك شيء جميل وعلى قلبك زي العسل لما تلاقي ان ليه نتيجة ، ولما طفلك يديكي اول ابتسامة ساحرة واول نظرة ماكرة من عنيه هتنسي الدنيا.. انصحك تكتبي اسمك على ورقة وتعلقيها ف مكان تقدري تشوفيه بسهولة ف البيت لان ضحكة طفلك هتنسيكي حتى اسمك

اسمحيلي يا ام يا صغنونة انقلك شوية خبرات ، اظن انها هتساعدك تخطي اول فترة من حياة طفلك ، وهي اكتر فترة الام فيها بتكون محتاجة دعم ، لان الطفل بيكون كائن جديد على حياتها ومش عارفة تعمل معاه ايه .

اول حاجة لازم افكرك بيها ان طفلك هيكون في اول اربعين يوم بيستعبط على الاخر .. سيادته فاكر نفسه لسه في الرحم ، عشان كدة بيتصرف على هذا الاساس.. يعني اكيد وانتي حامل فيه لاحظتي انه حركته بتقل بالنهار وبتزيد بالليل ، واكيد دا كان مسببلك ارق .. الوضع هيستمر كدة بالظبط .. هينام بالنهار ويصحالك طول الليل .. نصيحتي ليكي تنامي وقت ما ينام عشان تقدري تصحي وقت ما يصحى بالليل ، والا هتلاقي نفسك بقيتي حسحس .. عارفة حسحس؟ فيه فيلم لطيف كدة لمحمود حميدة اسمه كيد العوالم ، وقصته باختصار انه كان متجوز تلاتة طلق اتنين منهم فاتفقوا مع التالتة عليه لحد ما اتجنن وبقى ماشي في الشارع بهدوم مقطعة يقول : " انا حسحس وحسحس انا " .. صدقيني هتفتكري حسحس كتييييييير في الايام الجاية .

اوعي تحاولي تعملي ناصحة وتقولي احاول اخلص شغل البيت وهو نايم او اقعد مع جوزي حبيبي عشان ميحسش ان الواد اخدني منه .. انسي.. هتلاقي نفسك بتنهاري تماما .. افتكري حسحس .

الحاجة التانية هي موضوع الاكل.. اكلك واكله كمان .. لو كنتي ناوية ترضعيه طبيعي يبقى اهم حاجة بانصحك بيها هي الصبر .. اوعي تستسلمي من اول مرة يرفض فيها الرضاعة او ميعرفش يرضع كويس .. فكّري نفسك دايما ان الرضاعة دي حاجة جديدة عليه .. هو في الرحم كان قاعد زي الباشا والاكل بيدخل جسمه من المشيمة للدم مباشرةً.. مكانش بيتعب في حاجة ، يبقى لازم نستحمله شوية ، ونفتكر كمان انه لسه خارج على عالمنا المزعج ، والكائن الوحيد اللي يعرفه هو انتي .. بيتهيالي الفكرة دي هتديكي صبر عليه ..

عشان صدرك يفرز لبن كفاية لطفلك لازم تاكلي كويس .. اهم 3 حاجات في موضوع اللبن دا هما الميه واللبن واللحوم .. الميه مهمة لان 87 % من لبن الام ميه ، يبقى عشان نساعده يبقى كتير لازم نشرب ميه كتير .. اللبن مهم لان جسمك طول فترة الرضاعة بيفقد كالسيوم ، تبقي محتاجة تعوضي اللي بتفقديه وف نفس الوقت تدي طفلك شوية فايدة .. ما احنا مش عاوزين لبن الام يبقى كله ميه وبس .. اخر حاجة هي اللحوم ودي مهمة جداااااااااااا عشان لبنك يبقى كامل الدسم .. يعني يكون مشبع لطفلك .

حاجة كمان متعلقة بالرضاعة وهي : ازاي تعرفي ان طفلك بيشبع ؟ فيه شوية علامات تعرفك دا ، منها اللي بيحصل في اول اربعين يوم وبعدها بيختفي ومنها اللي بيدوم طول فترة الرضاعة ..

في اول اربعين يوم من علامات الشبع ان طفلك اول ما يرضع يتبرز .. النقطة دي بتختفي بعد الاربعين ؛ لان الطفل بيكون خلاص نظم جهازه الهضمي ، انما هي علامة كويسة من ضمن العلامات .

العلامة التانية ودي مهمة قوي ان طفلك ينام بعد ما يرضع .. مفيش طفل جعان يقدر ينام .. خدي بالك ان فيه اطفال لئيمة شوية .. بتنام وهي بترضع ورغم كدة تستمر في الرضاعة ، واول ما تخلص تصحى .. لو طفلك من النوع دا متفضليش تقولي لنفسك : ما هو اول ما خلص رضاعة صحي يبقى لسه جعان .. لا .. طالما كان بيرضع وهو رايح في النوم يبقى خلاص هو بيشبع .

العلامة التالتة انه بعد ما يخلص رضاعة بيبقى ساكت حتى لو مش نايم .. الطفل اللي بيفضل يزن وهو لسه مخلص رضاعة يبقى طفل جوعان .. حاولي ترضعيه من الناحية التانية اللي هو مخلصهاش .

العلامة الاخيرة ودي هي فصل الختام زي ما بيقولوا هي الميزان .. لو طفلك وزنه بيزيد بالمعدل الطبيعي يبقى دا معناه انه شبعان والحمد لله .

نيجي بقى لحاجة مهمة قوي هي الطفل اللي بيعيط .. لما طفلك يعيط تعملي ايه ؟ ازاي تقدري تعرفي هو بيعيط ليه ؟ فيه حاجات اساسية بتخلي الطفل في السن دا يعيط :

1 – الجوع : ودي اول حاجة لازم تفكري فيها .. لو كان عدى وقت كفاية على اخر رضعة ليه ، يبقى اكيد جعان .. الحل بسيط قوي.. رضعيه .

2 – المغص : الاطفال في اول شهرين او تلاتة بالكتير بيجيلهم مغص مؤلم .. غالبا بيكون بالليل ، وسببه ان الامعاء بتتمدد وبتمر فيها الغازات .. حاجة ملكيش ذنب فيها ، ولازم تحصل لكل طفل ، عشان كدة اول حاجة لازم تفكري فيها هي ان دا امر طبيعي يبقى اوعي تتوتري .. اتصرفي بمنتهى الهدوء .. فيه حاجة اسمها ماء غريب دي كويسة للمغص .. مش بتمنعه لكن بتخفف منه شوية ، وهي مش مضرة اطلاقا لانها عبارة عن مجموعة اعشاب .. ادي طفلك منها ، ونيميه على بطنه وامسحي برفق على اسفل ضهره .. النومة دي بتساعده على التخفيف من المغص ، وبتساعده كمان على التخلص من الغازات .

3- الرغبة في النوم : اوقات الطفل بيكون عاوز ينام ومش عارف .. حاجة غريبة مش كدة ؟ اول حاجة هتيجي ف بالك : طب ما اللي عاوز ينام يغمض عينيه وينام .. لا الموضوع عند الاطفال مش بالبساطة دي .. حاولي تتحركي بيه شوية او تهزهزيه بلطف جدا ، لان الهزهزة العنيفة ممكن تسببله تلف في المخ لا قدر الله .

4 – الرغبة في شوية حنان : اوقات طفلك بيعيط عشان تحضنيه .. اكيد انتي سيباه على السرير بحجة انه يتعود على سريره او انك تعبانة .. معلش .. تعالي على نفسك شوية وشيليه هتلاقيه سكت .

5 - حفاض مبلول : لو مش جعان يبقى تاني حاجة تفكري فيها هي البامبرز بتاعه .. افتحيه وشوفي هو نضيف ولا محتاج يتغير .. الطفل مبيحبش يبقى مبلول او مش نضيف .. اتصرفي بسرعة عشان تخلصيه من الاحساس المزعج دا .

ومادام اتكلمنا عن الحفاض المبلول يبقى لازم نتكلم شوية عن التهابات الحفاض .. ايه سببها وازاي نمنعها ونعالجها ازاي لو ظهرت ..

التهابات الحفاض هي تهيج في منطقة الجلد اللي بيغطيها الحفاض ، وليها اسباب كتير ، منها عدم تغيير الحفاض بانتظام ؛ لان البول والبراز ليهم تاثير سيء جدا على جلد الطفل الحساس اصلا ، وكمان استخدام الصابون كتير في غسل المنطقة دي بيسبب الالتهاب ، وفيه حاجة مهمة جدا بتسبب الالتهاب دا وهي المناديل المعطرة ، حتى لو مكتوب عليها انها خالية من الكحول . نصيحتي ليكي اوعي تستعمليها في تنظيف طفلك الا للضرورة القصوى .. يعني تكوني في مكان مفيهوش ميه او مش عارفة توصلي للميه ، وساعتها لازم اول ما ترجعي بيتك تعيدي تنظيف مكان الحفاض بالميه ..

كمان طالما احنا في الصيف حاولي متخليش طفلك لابس البامبرز طول الوقت .. يعني طالما انتي في البيت وهو صاحي مش نايم اكتفي بانك تحطيه على بشكير نضيف تحته مشمع ، وخليه من غير البامبرز ، وتابعيه من وقت للتاني.. دا بيخلي منطقة الحفاض تتهوى ودا بيساعد على عدم التهابها ..

كمان لما تنضفي المكان دا نشفيه كويس قوي – بس برفق – لان الرطوبة من اسباب تكاثر الفطريات اللي بتسبب الالتهاب .

استعملي دايما كريم يكون من مكوناته الزنك وزيت الزيتون .. الكريمات اللي فيها زنك بس متنفعش ، لازم يكون معاه زيت زيتون .. ادهني بيه منطقة الحفاض بعد تنظيفها ، وبلاش تحطي كومة كريم .. ادهني طبقة رقيقة ودلكيها لحد الجلد ما يتشربها .

طرق العلاج : لو طرق الوقاية منفعتش – لا قدر الله – لاي سبب من الاسباب ، لازم تزوري طبيب الاطفال ، ولغاية ما تعملي كدة اتاكدي دايما من عدم وجود رطوبة في منطقة الحفاض ، ومتقفليش البامبرز جامد على طفلك يعني هويه شوية ، وبعدها زوري الطبيب واتاكدي ان العلاج اللي هيكتبهولك يكون كريم مش مرهم ، لان المراهم بتنفذ من الجلد للجسم ، لكن الكريم تاثيره على الجلد بس .

اخر حاجة هكلمك عنها هي اظافر طفلك .. ضروري تقصيها لانها بتكون حادة جدا ، وفي الغالب بيخربش بيها وشه وممكن يخربشك انتي كمان اثناء الرضاعة .. التوقيت المثالي لقصها هو اثناء نوم الطفل ، لان دا مش هيخليه يحرك ايديه عشان يمنعك تقصي اظافره ، وكمان هيخليكي مرتاحة مش حاسة بتوتر وانتي بتعملي كدة .. استخدمي مقص الاطفال واهتمي بقص الزوايا ، لانها لو طولت ممكن تنغرز في الصوابع نفسها وبتكون مؤلمة جدا .

دي شوية حاجات كدة هتفيدك في تجربة الامومة لاول مرة ، وافتكري دايما انك مسؤولة عن الطفل اللي ربنا اهداهولك ، يعني هو من غيرك ميعرفش يعيش.. شفتي انتي عليكي مسؤولية اد ايه ؟ باذن الله هتكوني اد المسؤولية وربنا معاكي
.
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
نصائح أم
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
y2h1 :: دكه الغلابه للاسره :: اوضه المشاكل الاسريه-
انتقل الى: